மீண்ட சகோதரியின் அடுத்த பக்கம்!!

தேறிக் கொண்டிருக்கும் சகோதரியின் உடல் நிலை!!

எனது சகோதரியின் உடல்நிலை சோகத்தின் உச்ச நிலையை தொட்ட போது நான் மனம் நொந்து ஒரு பதிவு போட்டேன்.

அந்த இடுகைதான் சகோதரியின் மீளாச் சோகம்.

ஏற்கனவே தவறுசெய்த மருத்துவமனையில் மறுபடியும் பல சிகிச்சைகள் செய்தும், செய்ய வைக்கப் போராடிய போராட்டத்திற்கு பலன் எதுவும் கிடைக்கவில்லை. மன வலியும், பண வலியும் தான் மிஞ்சியது. அலைச்சல், அதனால் ஏற்பட்ட மன உளைச்சல் இருக்கே அதை வார்த்தைகளினால் கூற இயலாது.

அக்காவிற்கு மருத்துவம் செய்து கொண்டிருந்த மருத்துவமனையில் கடைசி வரை முடியவில்லை என்று கூறவில்லை. நேரே போனாலும் சரி, தொலை பேசியானாலும் சரி, அவர்கள் தொடர்ந்து கொடுப்பது வலி நிவாரணிதான். அதனால் எந்த வித பலனும் கிடைக்கவில்லை. முடியாது என்றும் இதுவரை கூறவில்லை.

இந்த ஆட்டத்திற்கு முடிவுகட்ட எண்ணி எங்கள் கதையை மனிதாபிமானத்துடன் கேட்ட ஒரு மனித தெய்வம் அருமையான மருத்துவமனைக்கு அழைத்துச் சென்றார்கள். அங்கு மறுபடியும் எல்லா சோதனைகளும் செய்துவிட்டு, சகோதரியின் இன்றைய நிலையை எங்களுக்கு உணர்த்தி, என்ன செய்ய வேண்டும் என்றும் கூறினார். எங்களுக்கும் அவரின் பரிந்துரை மிகவும் உகந்ததாக இருந்ததினால் ஒத்துக் கொண்டோம்.

மறுபடியும் மருத்துவச் சிகிச்சை அதாவது அறுவை சிகிச்ச உதவியுடன் ஓரளவிற்கு வலியில் இருந்து விடுதலை கிடைத்து விட்டது. நடக்கும் அளவிற்கு தயார் செய்திருக்கின்றார்கள்.

ஆனால் சாதரண நிலையை அடைய இன்னும் சில மாதங்கள் ஆகும் என்று கூறி இருக்கிறார்கள். அந்த நம்பிக்கையில் அந்த குடும்பம் தனது இயல்பான வாழ்க்கை நிலைக்கு மாறியுள்ளது.

நான் எனது சகோதரி உடல் நிலை குறித்து எழுதிய இடுகையில் நீங்கள் அனைவரும் எனது சகோதரி உடல் நிலை விரைவில் குணம் அடைய வாழ்த்தினீர்கள். உங்களின் வாழ்த்து எனது சகோதரியின் உடல் நலம் தேற மிகவும் உதவியாக இருந்தது என்பதில் சிறிதளவும் ஐயமில்லை.

உங்கள் அனைவருக்கும் எனது நெஞ்சார்ந்த நன்றிகள்.
உங்களின் அன்பிற்கும் எனது நன்றிகள்.